سامي حرك ـ
عادة تأجيل الأعياد اللي بتيجي فـ نص الأسبوع لآخره، لازم نراجعها، لأن فـ الآخر محدش بيستفيد منهم إلا الموظفين، يعني أغلبية الشعب ملهاش علاقة بالحكاية دي، لأن الشعب مبيحتفلش بجد إلا بالأعياد الدينية وعيد شم النسيم وعيد الأم!
لازم نفرق بين العيد الوطني التاريخي اللي قيمته زاي قيمة الآثار، والعيد السياسي اللي بيبروز مناسبة معينة ممكن تتغير، وحصل كتير إن مناسبات من دي اتغيرت بمجرد ما اتغير النظام!
عيد شم النسيم بقا، هوه العيد المصري الوحيد اللي بينطبق عليه تعريف العيد الوطني التاريخي!
عيد شم النسيم، أقدم أعياد الزمان، يعني أقدم عيد -فـ الكون- بتحتفل بيه مصر بتواصل الأجيال من آلاف السنين!
شم النسيم، زاي الهرم وأبو الهول وصقارة والأقصر وأصوان، لهم قيمة أثرية وطنية وإقليمية ودولية!
يبقا نحافظ عليه، ونحفظ قيمته واحترامه وهيبته وسط الأعياد!
خلونا بقا نفتكر مع بعض تحليل إسم ”شم النسيم“ :
أول حد سمعته بيقول إن كلمة ”نسيم “ تصريفة من الهيروجليفي: ”نـچـم“ بتعطيش الـﭽيم، كان المرحوم محسن لطفي السيد!
قال إيه محسن بيه؟
قال إن كلمة النسيم اللي فـ شم النسيم, جدرها من المصري ”نـچـم“، اللي فـ هيئة قرن الخروب بالهيروجليفي!
الجيم المتعطشة، بالتصريف تبقا شين، والشين بتتبدل وتتشقلب مع السين!
قاعدة التصريف بالشقلبة، يعني حروف المخرج الواحد بتتشقلب كأنها صوت واحد!
تقول شمس أو سمس، وتقول سجرة أو شجرة، وتقول مستشفا أو مشتشفا .. لخ
”نـچـم“ بتعطيش الجيم، اللي بتبقا شين، معناها الحلو اللطيف، وصف لحالة الجو والنسمة اللي بتلطف حرارة الجو!
وصلت إززاي للعربي والعبري (لسه بالشين) والقبطي لغاية كلامنا الحالي؟
دي بقا قصة تانية، شرحناها فـ مقال سابق عن أسباب الشبه بين العربي والمصري!
وتأثير اللغة المصرية فـ كل لغات المنطقة والعالم، معروف ومعترف بيه!
#بنتكلم_مصري
“شمو“ = صيف
لطيف = ”نـچـم“
”شمو نـچـم“ = شم نسيم = الصيف اللطيف = لطافة الصيف
كل ”شم نسيم“ ومصر والمصريين بخير، وربنا يجعل كلامنا خفيف ولطيف.
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.
________________
