إيجبت .. إيجيبتوس .. أم الدنيا

سامي حرك ـ وطني ـ

ده جدر الاسم الشعبي لمصر، والمعروف فـ العالم كله (Egypt) بسبب تصريفة (ايجيبتوس) اليونانية.

السما اللي محوطة ع الكون بجسمها دي لها أسامي كتير:

منهم (نوت nwt ) اللي منها التصريفة (نوة)، يعني ماية جاية م السما.

ومنهم (مت mwt)) أو (أمات) اللي منها تصاريف (أمه) و (ماما) واسم الأم فـ معظم اللغات.
ومنهم الإسم (بات  bȝt ) اسم أقدم ربة جمال فـ الكون، ومنها التصريفة (بت) يعني الست الحلوة beauty)!

نيجي بقا للإسم بتاع المقال: (جبت  gbt ) وده الإسم اللي خدته رمز الأرض (جب) بمجرد ما اتجوزت وبقت (جبت). يعني الموضة بتاعت أسامي صفية زغلول وجيهان السادات وهيلاري كلينتون دي حاجة من تاريخ بداية الكون المصري، الست المهمة تاخد اسم جوزها المهم!

الإسم (جبت) مع أداة تعريف أو بادية لغوية قديمة (ألف) كان المصريين يحبو يسمو بيه بلدهم: (اجبت)، ويوصفوها باعتبارها السما اللي محوطة ع الكون، وبالتأكيد الوصف ده أثر فـ ولادة جملة: (أم الدنيا).

الأسطورة، أو الحدوتة، القديمة بتقول إن السما (نوت) بعد ما اتجوزت الأرض (جب) وبقا إسمها (جبت)، وخلفت منه (وزير) و (سوت) و (است) و (نبت-حوت)، حصل زاي هوجة أو انتفاضة ضد الملك (رع) والنتيجة إن (رع) ساب الأرض وصعد لعرشه اللي فـ السما بواسطة البقرة (نوت/ جبت). والصورة المشهورة دي اللي هتلاقيها تقريبن فـ كل الجداريات القديمة، بتصور عملية الصعود، بمعونة الأرض (جب) اللي ساند بطن البقرة بإيديه من تحت، وعدد (8) تمن مساعدين بيوازنو عملية الصعود، وفوق الهوا (شو) بيوجه ويقود!

السما (نوت/ جبت) صعدت واستقرت فـ السما، محوطة ع الكون زاي ما فـ الصورة اللي قبل كده، واختصارها بالقاموس، وسابت ولادها واحفادها، اللي مجدوها وخلدوها بتسمية بلدهم بإسمها Egypt  بالظبط زاي ما عائلات كتير بتخلد أسامي الجدود والستات فـ أسامي الأحفاد والحفيدات!

الوصف أو الاسم الشعبي ده، نقله الكتاب والرحالة اليونانيين قبل زمن البطالمة بكتير، وضافو له حتة يوناني بقا: (اجيبتوس) وكمان العرب لقطو الإسم الشعبي ده، وضافو له حته عربي بقا: (قبط) والبلد بقا اسمها (بلاد القبط)!

ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية

ايجبت .. ايجيبتوس